Баку-Москва: "Спутниктеги" тинтүү, азери диаспорасы

Баку менен Москва ортосундагы чыңалуу күчөп баратат. Шейшембиде Орусиянын тышкы иштер министрлиги Азербайжандын элчиси Рахман Мустафаевди чакыртты. Мунун алдында Москва каржылаган “Спутник-Азербайжан” агенттигинин Бакудагы кеңсесинде жүргүзүлгөн рейд маалында эки адам кармалган. Азербайжан ошондой эле Орусиянын бардык маданий иш-чараларын токтотууну чечти. Мындай дипломатиялык араздашууга Екатеринбургда теги азери жарандарынын кармалышы жана бул окуянын адам өлүмү менен коштолгону май тамызды. Тараптардын алакалары буга чейин эле солгундай түшкөн.